«ЭКОЛОГ БЮЛЛЕТЕНІ» ЖУРНАЛЫНЫҢ МАУСЫМ АЙЫНДАҒЫ САНЫНДА «ҚАЗАҚТҮРІКМҰНАЙ» ЖШС-ДАН ЗЕЙНЕТ ДЕМАЛЫСЫНА ШЫҚҚАН АРДАГЕР-ЭКОЛОГ ДЭВИД ГЕННАДЬЕВИЧ ЯН ТУРАЛЫ МАҚАЛА ЖАРИЯЛАНДЫ
Давид Геннадьевич Ян 25.11.1944 жылы Атырау (Гурьев) облысы Махамбет (Бақсай) ауданы В. Чкалов атындағы ауылда дүниеге келді. 1964 жылы Гурьев мұнай техникумын (мұнай факультетін) мұнай және газ ұңғымаларын бұрғылау мамандығы бойынша тәмамдады.
Ол өзінің еңбек жолын 1962 жылы «Маңғышлақмұнайгазбарлау» тресінің бөлімшелерінде (Өзен және Жетібай терең бұрғылау мұнай-газ барлау экспедицияларында) өндірістік және дипломдық практикадан өту арқылы бастады. Ал оқуын аяқтағаннан кейін МНГР тресіне жұмысқа жіберілді. 1964-1996 жылдар аралығында Маңғышлақ ұңғымаларды игеру және сынау кеңсесінде 30 жылдан астам еңбек етті. 1996 жылдың сәуір айынан бастап «Қазақтүрікмұнай» ЖШС-ға инженер-эколог болып ауысты.
Ол адал еңбегі үшін «Маңғышлақмұнайгазбарлау» тресінің көптеген Құрмет грамоталарымен марапатталды. 1980 жылы Маңғышлақ түбегінде көмірсутегі кен орындарын ашқаны үшін «Құрмет Белгісі» орденін алды. Табиғатты қорғау саласындағы белсенді қызметі үшін Давид Геннадьевич «ҚазМұнайГаз» ҰК АҚ және «Қазэнержи» басшыларының, сондай-ақ Маңғыстау облысы әкімінің Құрмет грамоталары және алғыс хаттарымен марапатталды.
«Эколог Бюллетенінің» «ЖАҚСЫ ЭКОЛОГ ҚАНДАЙ ҚАСИЕТТЕРГЕ ИЕ БОЛУЫ КЕРЕК?» сұрағына Дэвид Геннадьевич былай деп жауап береді:
- Ең алдымен, ол табиғат пен қоршаған ортаны жақсы көруі керек. Ісіне жауапты және ұқыпты болуға тиіс, сонымен қатар командада да, өз бетінше де жұмыс істей алуы қажет. Эколог үшін, қаншалықты оғаш көрінсе де, оның бойында стресске төзімділік пен азаматтық батылдықтың болуы маңызды. Бұл қасиеттер жоғары инстанциялар алдында өз құқығын қорғау қажет болатын жағдайлар туындаған кезде аса қажет.
«Қазақтүрікмұнай» ЖШС-да эколог болып жұмыс істеген кезінде Давид Геннадиевич Батыс Елемес және Шығыс Сазтөбе кен орындарының вахталық қалашықтарын көгалдандыру жұмыстарына жеке өзі қатысты. Давид Геннадиевичтің басшылығымен отырғызылған жасыл желектер әлікүнге дейін жайқалып өсіп тұр, «Қазақтүрікмұнай» ЖШС қызметкерлері сол желектің саясында демалады.
